بنی اسرائیل صدیوں تک مصریوں کی غلامی میں رہے تھے ان کے حوصلے پست ہو گئے تھے، ان کے اندر بزدلی آ گئی تھی، فلسطینیوں کے بارے میں جب انہوں نے سنا کہ وہ طاقت ور اور ظالم ہیں تو کہنے لگے:

’’موسیٰ! وہاں تو بڑے ظالم لوگ بستے ہیں ہم اس وقت تک بستی میں داخل نہیں ہونگے جب تک وہ وہاں سے نکل نہ جائیں۔‘‘

حضرت موسیٰ علیہ السلام نے انہیں سمجھایا کہ:

’’جس خدا نے تمہیں اتنا نوازا ہے وہ تمہاری مدد کرے گا، اللہ پر بھروسہ رکھو۔‘‘

لیکن وہ قائل نہ ہوئے کہنے لگے:

’’اے موسیٰ! ہم اس وقت تک شہر میں داخل نہیں ہونگے جب تک دشمن وہاں موجود ہے تو اور تیرا رب دونوں جا اور ان سے لڑ۔‘‘

حضرت موسیٰ علیہ السلام قوم کے اس جواب پر بہت افسردہ ہوئے اور بارہ گاہ الٰہی میں عرض کیا:

’’اے اللہ! میں اور میرا بھائی حاضر ہیں اب تو ہمارے اور اس نادان قوم کے درمیان جدائی ڈال دے۔‘‘

اللہ تعالیٰ نے حضرت موسیٰ علیہ السلام کو تسلی دی اور فرمایا کہ:

’’ان کی نافرمانی کی سزا کے طور پر ارض مقدس (فلسطین) ان پر حرام کر دی گئی ہے اب یہ چالیس برس تک صحراؤں میں بھٹکتے رہیں گے۔‘‘