روح ِ اعظم میں وہ علوم مخفی ہیں جو اﷲتعالیٰ کی تجلی،مشیت اور حکمت سے متعلق ہیں۔روح اعظم سے واقف بندہ اﷲتعالیٰ کی ذات کا عارف ہوتاہے۔یہی برگزیدہ بندے ہیں جن کے بارے میں اﷲتعالیٰ نے فرمایا:
’’ میرا بندہ اپنی اطاعتوں سے اتنا قریب ہوجاتاہے کہ میں اس سے محبت کرنے لگتا ہوں۔یہاں تک کہ میں وہ آنکھ بن جاتا ہوں جس سے وہ دیکھتا ہے،وہ کان بن جاتا ہوں جس سے وہ سنتا ہے اور وہ ہاتھ بن جاتا ہوں جس سے وہ پکڑتا ہے‘‘
اﷲتعالیٰ سے قربت غیب کی دنیا میں داخل ہوئے بغیر ممکن نہیں،غیب کے عالم میں داخل ہونا یازمان و مکان سے ماوراء کسی چیز کودیکھنا اس وقت ممکن ہے جب آدمی زمان و مکان سے آزاد ہونے کے طریقے سے واقف ہو۔
مثال :
ہم کسی ایسی کتاب کا مطالعہ کرتے ہیں جو اتنی دلچسپ ہے کہ ہم ماحول سے بے خبر ہوجاتے ہیں۔کتاب ختم کرنے کے بعد ہم دیکھتے ہیں کہ کئی گھنٹے گزرگئے ہیں اور ہمیں وقت گزرنے کا احساس نہیں ہوا تو بڑی حیرت ہوتی ہے کہ اتنا طویل وقت کیسے گزرگیا اسی طرح جب ہم سوجاتے ہیں تو وقت کا احساس ختم ہوجاتا ہے۔
قرآن پاک میں ارشاد ہے:
’’ ہم داخل کرتے ہیں رات کو دن میں اور داخل کرتے ہیں دن کو رات میں‘‘
دوسری جگہ ارشاد ہے:
’’ ہم نکالتے ہیں رات کو دن میں سے اور دن کو رات میں سے‘‘
(سورۃ آ لِعمران۔ آیت نمبر۲۷)
تیسری جگہ ارشاد ہے:
’’ ہم ادھیڑ لیتے ہیں رات پر سے دن کو اور دن پر سے رات کو‘‘
(سورۃحج۔ آیت نمبر۶۱)