یہ بات روز مرّہ ہمارے مشاہدے میں آتی ہے کہ ہماری نظر ایک متعیّن حد میں کام کرتی ہے لیکن اگر نظر کی متعیّن حدود میں اضافہ کر دیا جائے تو نظر عام حالت میں جتنا دیکھتی ہے اس سے زیادہ فاصلہ پر دیکھ سکتی ہے۔ مثلاً ہم آنکھوں پر دُوربین لگا تے ہیں۔ دُوربین کے اندر جو شیشے (Lenses)لگے ہوتے ہیں وہ ان طول موج (Wavelength)کو جو نظر کیلئے دیکھنے کا باعث بنتے ہیں، آنکھوں کے سامنے لے آتے ہیں۔ اب ہم مِیلوں فاصلے کی چیز دیکھ لیتے ہیں۔ کسی آدمی کی نظر کمزور ہے۔ سامنے کی چیز اسے نظر نہیں آتی۔ اور چشمہ لگا نے کے بعد وہ دُور تک دیکھنے لگتا ہے۔ اس سے یہ نتیجہ نکلتا ہے کہ شیشے کے اندر ایسی صلاحیّت مَوجود ہے کہ اگر آپ اس کو صَیقل کر لیں، اس کہ طاقت بڑھا دیں تونظر دُور تک کام کرنے لگتی ہے۔ جب آپ شیشے کے اندر سے مِیلوں مِیل دیکھ رہے ہیں تو اُس آنکھ سے، جس آنکھ نے فرشتوں کو دیکھا ہے اور اللہ کو دیکھا ہے، غَیب کی دنیا میں کیوں نہیں دیکھ سکتے۔
یہ نہ سمجھا جائے کہ آدم کوئی ایسی چیز ہےکہ اس کے اندر مخصوص صلاحیّتیں کام کرتی ہیں اور آدم کی اولاد کوئی ایسی چیز ہے جس میں وہ صلاحیّتیں کام نہیں کرتیں۔