جب ہم زندگی کا تجزیہ کرتے ہیں تو ہمارے سامنے ایک ہی حقیقت آتی ہے کہ آدم کا ہر بیٹا اور حوّا کی ہر بیٹی خوش رہ کر زندگی گزارنا چا ہتے ہیں لیکن زندگی کا مادّی نظریہ ان کو ہر ہر قدم پر مایوس کرتا ہے اس لئے کہ ہماری زندگی کا ہر ہر لمحہ فانی اور متغیر ہے۔ مادّی اعتبار سے ہمیں یہ بھی علم نہیں ہے کہ سچی خو شی کیا ہوتی ہے؟ اور کس طرح حاصِل کی جاتی ہے؟ حقیقی مسرّت سے واقف ہونے کیلئے ضروری ہے کہ ہم اپنی اصل بنیاد (Base) تلاش کریں۔

جب ہم کچھ نہیں تھے تو کچھ نہ کچھ ضرور تھے، اس لئے کہ کچھ نہ ہونا ہمارے وُجود کی نفی کرتا ہے۔ ہماری مادّی زندگی ماں کے پیٹ سے شروع ہوتی ہے اور یہ مادّہ ایک خاص پروسیس (Process) سے گزر کر اپنی انتہاء کو پہنچتا ہے تو ایک جیتی جا گتی تصویر عدم سے وُجود میں آ جاتی ہے۔ ماحول سے اس تصویر کو ایسی تربیت ملتی ہے… اُسے اس بات کا علم نہیں ہوتا کہ سچی خوشی حاصِل کرنے کا طریقہ کیا ہے؟ اور کس طرح یہ سچی خوشی حاصِل ہوتی ہے؟
حقیقی مسرّت سے ہم آغوش ہونے کے لیے انسان کو سب سے پہلے یہ جاننا چاہیے کہ:
زندگی کا دارومدار صرف جسم پر نہیں ہے بلکہ اس حقیقت پر ہے کہ جس حقیقت نے خود اپنے لئے جسم کو لباس بنایا ہے۔
پیدائش کے بعد زندگی کا دوسرا مرحلہ ہمارے سامنے یہ آتا ہے کہ ہمارا ہر ہر لمحہ مرتا رہتا ہے اور ہر لمحے کی موت دوسرے لمحے کی پیدائش کا ذریعہ بن رہی ہے۔ یہی لمحہ کبھی بچپن ہوتا ہے، کبھی لڑکپن، کبھی جوانی، اور کبھی بڑھاپے میں تبدیل ہو جاتا ہے۔