انبیاءؑ اور روحانی طاقت رکھنے والے انسانوں کے کتنے ہی واقعات اس کے شاہد ہیں کہ ساری کائنات میں ایک ہی لاشعور کار فرما ہے۔ اس کے ذریعے غَیب وشہود کی ہر لہر دوسری لہر کے معنی سمجھتی ہے، چاہے یہ دونوں لہریں کائنات کے دو کناروں پرواقع ہوں۔ غَیب و شہود کی فراست اور معنویت کائنات کی رگِ جان ہے۔ ہم اس رگِ جان میں، جو خود ہماری اپنی رگِ جان بھی ہے، تفکر اور توجّہ کرکے اپنے سیّارے اور دوسرے سیّاروں کے آثار و اَحوال کا انکشاف کر سکتے ہیں۔ انسانوں اور حیوانوں کے تصوّرات، جنّات اور فرشتوں کی حرکا ت و سکنات، نباتات و جمادات کی اندرونی تحریکا ت معلوم کر سکتے ہیں۔
مسلسل توجّہ دینے سے ذہن کائناتی لا شعور میں تحلیل ہو جاتا ہے اور ہمارے سراپا کا مصنوعی پرَت اَنا کی گرفت سے آزاد ہوکر ضرورت کے مطابق ہر چیز دیکھتا سمجھتا اور ذہن میں محفوظ کر دیتا ہے۔