حضرت موسٰی علیہ السلام اور حضرت خضر ؑ کے واقعہ میں یہ انکشاف ہے کہ اﷲ کے نظام میں ایسے لوگ بھی کام کرتے ہیں جو نبی نہیں ہیں لیکن یہ سب لوگ توحید پرست ہوتے ہیں اﷲ وحدہ لاشریک کی پرستش کرتے ہیں اور ان کی روحوں کو اﷲ کا عرفان حاصل ہوتا ہے۔یہی صاحب ِ عرفان لوگ اﷲ کی بادشاہی میں اﷲ کے نمائندے یا خلیفہ ہوتے ہیں۔
حضرت مریم علیہ السلام انہی جلیل القدربندوں میں سے ہیں۔جب فرشتوں نے کہا کہ ’’ اے مریم علیہ السلام! بلاشبہ اﷲ نے تجھ کو بزرگی دی اور پاک کیا اور دنیا کی عورتوں پر تجھ کو برگزیدہ کیا۔اے مریم علیہ السلام اپنے پروردگار کے سامنے جھک جا اور سجدہ ریز ہوجااور نماز قائم کرنے والوں کے ساتھ نماز ادا کر۔‘‘