صفا اور مروہ کے درمیان سات پھیرے لگانے کو سعی کہتے ہیں۔ یہ پھیرے حضرت بی بی ہاجرہ نے اپنے بیٹے حضرت اسماعیل ؑ کے لئے پانی کی تلاش میں لگائے تھے۔ بی بی ہاجرہ کی اس سعی کے نتیجے میں آبِ زم زم کا چشمہ ابل آیا۔ حضرت بی بی ہاجرہ کا یہ عمل ممتا کی لازوال مثال ہے۔ مامتا اﷲ کی صفت ہے۔ اﷲ اپنی مخلوق سے سترّ ماؤں سے زیادہ محبت کرتا ہے۔مخلوق کو محبت کے ساتھ پالتا ہے اور ان کے تقاضوں کی تکمیل کے لئے وسائل مہیا کرتاہے۔ ہر ماں ذیلی تخلیق کی ذمہ دار ہے جو دراصل اﷲ کی صفات کا مظاہرہ ہے۔ماں اپنے بچے سے بے پناہ محبت کرتی ہے اور اپنے بچے کی پرورش اور کفالت کے لئے انتہا تک کوشش کرتی ہے۔