امام بخاری ؒ ایک طویل قصے میں بیان کرتے ہیں کہ حضرت سعد بن ابی وقاص ؓ نے فرمایا اﷲ کی قسم میں اس شخص کے لئے بد دعا کرتا ہوں جس نے میری تین جھوٹی شکایتیں کی تھیں۔اے اﷲ یہ تیراجھوٹا بندہ جو مکاری سے شکایتیں سنانے کے لئے کھڑا ہوا ہے اس کی عمر دراز کردے۔حضرت سعد ؓ کی اس دعا کے بعد لوگ جب اسکی خیریت دریافت کرتے تھے تو وہ کہتا تھا میں بالکل بڈھا ہوگیا ہوں میری عقل ماری گئی ہے اور سعد ؓ کی بد دعا لگ گئی ہے۔عبدالمالکؓ کہتے ہیں کہ میں نے اس بڈھے کو اس حال میں دیکھا کہ بڑھاپے کی وجہ سے اس کی آنکھوں کو اس کی دونوں بھوؤں نے بالکل چھپالیا تھااور وہ راستہ چلتی لونڈیوں کو روکتا تھا اور بے حیائی کی باتیں کرتا تھا۔افلاس و غربت کی وجہ سے انتہائی تنگ دست تھا۔