قلندر شعور ہمیں بتاتا ہے کہ ذہن کو دنیاوی عَلائق اور دنیاوی معاملات سے یکسو کرنے کیلئے ایسی مشقوں کی ضرورت ہوتی ہے جن مشقوں سے ذہن دنیا کو عارضی طور پر چھوڑ دے اور ان مشقوں سے ذہن جب یکسو ہو جاتا ہے یعنی ذہن میں سے دنیا کی اہمیت ختم ہو جاتی ہے، یا یوں کہئے کہ دنیاوی معاملات روٹین کے طور پر پورے ہوتے ہیں تو آدمی کے اندر اس کی روحانی صلاحیّتیں بیدار ہونا شروع ہو جاتی ہیں۔ جب ان صلاحیّتوں میں ذہنِ انسانی بہت زیادہ متوجّہ ہوتا ہے تو شعور کے اوپر سے زرد رنگ کا خلیہ ٹُوٹنے لگتا ہے جس کے نتیجے میں زمان و مکان کی حد بندیاں اس طرح ختم ہو جاتی ہیں کہ آدمی بیدار ہوتے ہُوئے بھی ایسے عمَل کرنے لگتا ہے جس طرح کے عمَل یا جس طرح کے کام وہ خواب کی زندگی میں کرتا ہے۔ اسے مراقبہ کے اندر آنکھیں بند کئے ہوئے پوری طرح یہ احساس ہوتا ہے کہ میں جسمانی طور پر مَوجود ہوں، جسمانی طور پر زمین پر بیٹھا ہواہوں اور اس کے باوُجود میں چل پھر رہا ہوں اُڑ رہا ہوں اور فاصلوں کی نفی کرکے دُور دَراز چیزوں کو دیکھ رہا ہوں۔