ہر آدمی جو ذرا بھی شعور رکھتا ہے ہر وقت اسس بات کا مشاہدہ کرتا ہے کہ زندگی کا ہر لمحہ مر رہا ہے۔ ایک لمحہ مرتا ہے تو دوسرا لمحہ پیدا ہوتا ہے ۔دن مرتا ہے تو رات پیدا ہوتی ہے۔ بچپن مرتا ہے تو لڑکپن پیدا ہوتا ہے ، لڑکپن مرتا ہے تو جوانی پیدا ہوتی ہے اور جوانی مرتی ہے تو بوڑھاپا پید اہوتا ہے اور جب بوڑھاپا مرتا ہے تو خوبصورت مورتی کا ایک ایک عضو مٹی کے ذرات میں تبدیل ہو جاتا ہے ۔ہڈیاں جس کے اوپر انسانی ڈھانچے کا دارومدار ہے راکھ بن جاتی ہے،دماغ جس پر انسانی عظمت کا دارومدارہے اور جس دماغ کے اوپر انسان اکڑتا ہے ، دوسروں کے اوپر ظلم کرتا ہے ،خود کو خدا کہنے لگتا ہے ا س کو بھی مٹی کھا جاتی ہے اور مٹی کے ذرات کے بنے ہو ئے اس جیسے دوسرے انسان اس دماغ کو اپنے پیروں تلے رو ندتے ہیں ۔