زندگی کا ایک اہم پہلو یہ ہے کہ ہم ایسی چیز کی تلاش میں سرگرداں رہتے ہیں جس میں مسرت کا پہلو نمایاں ہو ۔ چونکہ ہم غم زدہ اور پرمسرت زندگی گزارنے کے قانون سے نا واقف ہیں اس لئے زیادہ تر یہ ہوتا ہے کہ ہم مسرؔت کی تلاش میں اکثر و بیشتر غلط سمت قدم بڑھا تے رہتے ہیں ،اور نا واقفیت کی بنا پر اپنے لئے ایسا راستہ منتخب کرلیتے ہیں جس میں تا ریکی، بے سکونی اور پریشانیوں کے سوا کچھ نہیں ہوتا ہے کہ ہم نہیں جانتے کہ وہ کون سا راستہ ہے جس راستے میں مسرؔت کی روشن قندیلیں اپنی روشنی بکھیر رہی ہیں ۔ وہ کونسی فضا ہے جس میں شبنم موتی بن جاتی ہے ۔ وہ کون سا ماحول ہے جو معطؔر اور پر سکون ہے ۔ وہ کونسی خوشبو ہے جس سے شعور روشن ہو جاتا ہے ۔