ایمان ایک ایسا جوہر ہے جس کی چاشنی اور حلا وت دنیا کی ہر چیز سے زیادہ ہے مگر یہ حلاوت اور چاشنی اسی بندے کو حاصل ہوتی ہے جو دنیا کی ہر چیز سے زیادہ اللہ کو محبوب رکھتا ہے ۔ وہ بندہ جو اللہ سے زیادہ دوسری چیزوں کو عزیز رکھتا ہے ،اللہ کا سچؔا بندہ نہیں ہے ۔ جب ہم محبت کا تذکرہ کرتے ہیں تو محبت ہم سے کچھ تقاضے کرتی ہے اور وہ تقاضہ یہ ہے کہ محبت ہمیشہ قربانی چاہتی ہے ۔ سب جانتے ہیں کہ محبت ایک ایسی قلبی کیفیت کا نام ہے جو ظاہر اً آنکھوں سے نظر نہیں آتی ۔ لیکن انسان کا عمل اس بات کی شہادت فراہم کر تا ہے کہ اس کے اندر محبت کا سمندر موجزن ہے یا نہیں ۔ ایک آدمی زبانی طور پر اگر اس بات کا دعویٰ کرتا ہے کہ میں اپنے محبوب سے محبت کرتا ہوں لیکن جب ایثار اور قربانی کا وقت آتا ہے تو وہ اپنے قول میں سچؔا ثابت نہیں ہوتا، بلاشبہ اس کی محبت قابل تسلیم نہیں سمجھی جا ئے گی ۔