ہم با حیثیت بزرگ بار بار اعلان کرتے ہیں کہ نوجوان نسل کے ذہنوں سے بزرگوں کا احترام اٹھ گیا ہے۔ ا ن کے اندر وہ اخوؔت و حیا نہیں رہی جس کے اوپر مثالی معاشرہ تعمیر کیا جاتا ہے ۔ خدارا اپنے گریبان میں منہ ڈالئے یہ بھی دیکھئے کہ ہمارے قول و فعل میں کتنا تزاد واقع ہو چکا ہے ۔ اس کے باجود کہ ہم اپنا اختیار استعمال کر کے اس منافقانہ زندگی کو بدل سکتے ہیں ،ہم ہا تھ پر ہا تھ رکھ کر بیٹھے ہیں ۔ ہم جو خود نہیں کرتے اس کی توقع اپنی اولاد سے کیوں کر تے ہیں ۔ آج اگر ایک باپ جھوٹ کی ملمع شدہ زندگی میں قید ہے تو وہ اولاد سے کیوں کر توقع کرسکتا ہے کہ وہ سچؔی اور حق آشنا زندگی گزارے گا ۔ بچؔے ماں کے پیٹ سے قاتل، چور، ذخیرہ اندوز، منافق، اسمگلرپیدا نہیں ہوتے۔ انہوں نے اپنے بزرگوں کو جو کچھ کر تے دیکھا ہے ترقی دے کر اسے فن بنا دیا ہے۔