منفی سوچ اتنی زیادہ عام کیوں ہے کہ آدمی ان چیزوں سے خوش نہیں ہوتا جو اسے حاصل ہیں ۔ ان خواہشات کے پیچھے کیوں سرگرداں ہے جن کے حصول میں وہ اعتدال کی زندگی سے روگردانی پرمجبور ہے۔ اس کا ایک ہی جواب ہے کہ ہم صبر واستغنا کی نعمتوں سے محروم ہیں ۔ قرآن کہتا ہے کہ جو لوگ صابر وشاکر اور مستغنی نہیں ہیں فانی کائنات سے دور ہوجاتے ہیں۔ سکون و عافیت اور اطمینان قلوب دبیز پردوں میں چھپ جا تے ہیں۔

سکون اور خوشی کوئی خارجی شئے نہیں ہے ۔ یہ ایک اندرو نی کیفیت ہے۔ اس اندرونی کیفیت سے جب ہم آشنا ہوجاتے ہیں، سکون و اطمینان کی بارش ہونے لگتی ہے ۔ بندہ اس ہمہ گیر طرز فکر سے آشنا ہو کر مصیبتوں ، پریشانیوں اور عذاب ناک زندگی سے رستگاری حاصل کر کے اس حقیقی مسرت اور شادمانی سے واقف ہوجا تا ہے جو بندوں کا حق اور ورثہ ہے ۔