زمین پر بسنے والا ہر آدمی جب اپنا تذکرہ کرتا ہے تو کہتا ہے میں مسلمان ہوں ،میں ہندو ہوں ،میں پارسی ہوں ،میں عیسائی ہوں حالانکہ انسان کی روح کا اصل نام نہیں رکھا جاسکتا۔ روشنی ہر جگہ روشنی ہے چاہے وہ عرب میں ہو، عجم میں ہو یا یورپ میں ہو یا ایشیا کے کسی حصؔے میں ہو۔ اس دنیا میں جو بھی پیغام آیا وہ اپنے الفاظ کے ساتھ قائم ہے ۔عیسائیوں کے لئے بائیبل کے الفاظ مذہب کا درجہ رکھتے ہیں اور مسلمانوں کے لئے قرآن مذہب کا پیش رو ہے ۔ ہندو بھگوت گیتا کے الفاظ کی عبادت کرتے ہیں ۔ سب آسمانی کتابیں دراصل خدا کے برگزیدہ بندوں کی وہ آوازیں ہیں جو رو شنی بن کر تمام عالم میں پھیل گئی ہیں ۔