جہاں تک طویل انتظار کا تعلق ہے ،کائنات کے تخلیقی فارمولوں پر اگر غور کیا جا ئے تو یہ بات اظہر من الشمس ہے کہ ہر گزرنے والا لمحہ آنے والے لمحات کے انتظار کا پیش خیمہ ہے ، انتظار بجائے خود زندگی ہے ۔ بچپن سے لڑکپن ،لڑکپن سے جوانی اور جوانی بڑھا پے کے انتظار میں گزرتی ہے ۔ اگر آج پیدا ہونے والے بچے کی زندگی میں آنے والے ساٹھ سالوں پر محیط بڑھاپا چپکا ہوا نہ ہو تو پیدا ہونے والا بچہ پنگوڑے سے باہر نہیں آئے گا ، نشوونما رک جائے گی ،کائنات ٹہر جائے گی، چاند سورج اپنی روشنی سے محروم ہو جائیں گے ۔ جب ہم اپنی زمین میں کوئی بیج ڈالتے ہیں تویہ دراصل انتظار کے عمل کی شروعات ہے کہ یہ بیج پھول کھلائے گا ۔