ایک روز ایک پاگل جب دوسرے پاگلوں کے ساتھ کام پر پاگل خانے سے باہر گیا تو محافظ کی نظروں سے بچ کر فرار ہوگیا۔ اوراپنے گھر کی طرف نکل گیا۔ شام کو گننی کے وقت جب وہ پاگل خانے میں نظر نہ آیا تو اس کی تلاش شروع ہوئی۔ ڈاکٹرعبدالحمید خاں صاحب مرحوم بہت پریشان ہوئے اور ماتحت ملازمین پرخفا ہونے لگے۔ اسی دوران باباحضور تشریف لائے اور فرمایا۔’’کیوں گھبراتے ہو، وہ کل خود چلا آئے گا۔‘‘

چنانچہ دوسرے دن وہ پاگل ازخود گیٹ پرموجود تھا۔ پاگل خانے کے ملازمین نے اسے اندر بلالیا۔ اورڈاکٹر صاحب کو اطلاع دی۔ انہوں نے آکر اس سے پوچھا کہ تو کہاں چلا گیاتھا۔ تو اس نے اپنی زبان میں جواب دیا کہ اپنے گاؤں گیا تھا۔ پھر یہی پوچھا گیا تو اس نے دوبارہ یہی جواب دیا۔ پھر پوچھا کہ تو واپس کیسے آگیا تو اس نے جواب دیا۔’’بھائی تاج الدین نے مجھے دو طمانچے مارے اور کہا،کہاں جاتاہے، چل پاگل خانے اورمجھے کھینچ کر لے آئے۔‘‘