جس طرح سانس کی مشقوں کے ذریعے شعور یا جسمانی نظام طاقتور ہوتا ہے اسی طرح صَعودی سانس کے ذریعے انسان کی روح میں اَنوار کے ایسے ذخیرے جمع ہو جاتے ہیں جن ذخیروں سے آدمی فکشن (Fiction) اور مفروضہ حواس سے نکل کر حقیقی دنیا (غیب کی دنیا) میں پہنچ جاتا ہے۔ سانس کی مشق سے انسان کے اندر ذخیرہ کرنے والے مَوجود چھ اسٹور نور رَوشنی اور اِنرجی سے معمور ہو جاتے ہیں۔ روح کے اندر یہ چھ اسٹور مختلف مقامات پر ہیں۔ اور ان گوداموں میں جو رَوشنیاں جمع ہوتی ہیں ان کے رنگ مختلف ہیں۔
پہلے گودام میں زرد رنگ کی رَوشنیاں، دوسرے میں سرخ، تیسرے میں سفید رنگ، اور چوتھے میں سبز رنگ، پانچویں میں نیلا رنگ اور چھٹے میں بنفشی رنگ کی رَوشنیاں جمع ہیں ان رنگوں کے ملاپ (Combination) سے بہت سارے رنگ بنتے ہیں۔ یہ رنگ دراصل زندگی میں کام آنے والے جذبات کے آئینہ دار ہیں۔